Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 350 Hüküm no: 290 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vasiyetini yerine getiren Akıllızâde Mustafa Efendi’nin görülen muhasebesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Sofular Mahallesiʼnde sâkine iken bundan akdem vefât eden Hadice Hatun bt. İbrahim Efendi’nin sülüs-i muʻayyenesini tenfîze bâ-hüccet-i şer‘iyye vasiyy-i muhtârı olan Akıllızâde Mustafa Efendi b. Mehmed Efendi müteveffât-ı mezbûrun usûbet-i nesebiyye cihetinden hasren vârisi Müezzin Mehmed b. Osman Efendi hâzır olduğu hâlde vasiyy-i mezbûr[un] görülen muhâsebesi defteridir ki ber-vech-i âtî zikr olunur. Fi’l-yevmi’s-sâlis min-Cemâziyelevvel sene tisʻa ve hamsîn ve mi’e ve elf, 1159. Müteveffât-ı mezbûrenin nısf menzil semeninden vasiyy-i mezbûrun sülüsünden makbûzu, meblağ: 2.400. Yalnız iki bin dört yüz akçedir. Minhâ el-mesârif: Müteveffât-ı mezbûrenin ıskāt-ı salât için ve harc-ı hüccet-i vesâyet vasiyy-i mezbûrun masrûfu 1.056 akçe Ber-mûceb-i vasiyyet müteveffât-ı mezbûrenin kız karındaşı kızı Hadice’ye sülüsden vasiyy-i mezbûrun verdiği 960 akçe Ber-mûceb-i vasiyyet es-Seyyid Yahya nâm kimesneye sülüsden vasiyy-i mezbûrun verdiği 144 akçe Ber-mûceb-i vasiyyet Âişe nâm hatuna sülüsden vasiyy-i mezbûrun verdiği 240 akçe Yekûnü’l-mesârif: 2.400. Yalnız iki bin dört yüz akçedir. Vasiyy-i mezbûrun bâlâda mezkûr olduğu üzere sülüsden makbûzu harc u sarf olunup meblağ-ı mezbûr iki bin dört yüz akçeden yedinde ve zimmetinde bir akçe ve bir habbe bâkī kalmadığı işbu mahalle şerh verildi.