Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 355 Hüküm no: 295 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin vârislerinden kardeşi Hatib Mehmed Efendi’nin terekeden hissesini alarak diğer vârislerin zimmetlerini ibra etmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Takyecibaşı Mahallesi ahâlîsinden olup bundan akdem vefât eden eşrâf-ı kuzâtdan Mustafa Efendi b. Ahmed’in verâseti zevce-i menkûha-i metrûkesi Âişe Hatun bt. Mehmed ile sulbiye kebîre kızı diğer Âişe Hatun ve li-ebeveyn er karındaşı Hatîb Mehmed Efendi’ye münhasıra ve tashîh-i meselesi sekiz sehmden i‘tibâr olunup sihâm-ı mezbûreden bir sehmi zevcesi mezbûre Âişe Hatun’a ve dört sehmi kızı mezbûre diğer Âişe Hatun’a ve bâkī üç sehmi mezbûr Mehmed Efendi’ye isâbeti tahakkukundan sonra mezbûr Mehmed Efendi meclis-i şer‘-i şerîf-i enverde mezbûretân Âişe Hatun ve diğer Âişe Hatun taraflarından husûs-ı âti’l-beyânda tasdîka sâbitü’l-vekâle vekîlleri olan işbu râfiʻü’l-kitâb Mustafa Efendi b. Mehmed mahzarında bi’l-verâse ikrâr-ı tâm ve takrîr-i kelâm edip karındaşım müteveffâ-i mezbûrun terekesinden ba‘de ihrâci’l-mesârif ve’d-düyûn ber-mûceb-i defter tashîh-i merkūm üzere bana isâbet eden iki yüz otuz guruşu müvekkiletân-ı mezbûretân Âişe Hatun ve diğer Âişe Hatun bana def‘ ve teslîm, ben dahi ber-vech-i muharrer meblağ-ı mezbûru yedlerinden bi’t-tamam ahz u kabz eyledim, baʻde’l-yevm karındaşım müteveffâ-i mezbûrun terekesine müte‘allika âmme-i mîrâs da‘vâsından müvekkiletân-ı mezbûretân Âişe Hatun ve diğer Âişe Hatun’un zimmetlerini bi’l-verâse ibrâ ve ıskāt edip husûs-ı mîrâsa müte‘allik vechen mine’l-vücûh ve sebeben mine’l-esbâb katʻâ da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbiʻ min-Cemâziyelevvel sene tisʻa ve hamsîn ve mi’e ve elf. Şuhûdü’l-hâl: Hüseyin Çelebi b. Mustafa tâbiʻ-i Ebûbekir Ağa, es-Seyyid Halil Ağa b. el-Hâc Mustafa, es-Seyyid Mehmed Ağa b. es-Seyyid Mustafa, es-Seyyid Ahmed b. es-Seyyid Mehmed, Feyzullah Çelebi b. ( ) tâbi‘-i Ebûbekir Ağa, es-Seyyid Mehmed b. ( ) tâbi‘-i Ebûbekir Ağa.