Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 365 Hüküm no: 305 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hac yolunda vefât eden Zaim el-Hâc İsmail Ağa’nın vârislerinin terekeden hisselerini almaları Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Cezerî Kasım Paşa Mahallesi ahâlîsinden olup bu sene-i mübârekede tarîk-i hacc-ı şerîfde vefât eden Za‘îm el-Hâc İsmail Ağa b. Mehmed’in verâseti zevce-i menkûha-i metrûkesi Âişe Hatun bt. Mustafa Efendi ile vâlidesi diğer Âişe Hatun bt. Mehmed’e ve sulbiye sagīre kızı Afife’ye ve li-ebeveyn karındaşı oğlu Abdullah nâm sagīre münhasıra ve tashîh-i meseleleri yirmi dört sehmden i‘tibâr olunup sihâm-ı mezbûreden üç sehmi zevcesi mezbûr[e] Âişe Hatun’a ve dört sehmi vâlidesi diğer mezbûre Âişe Hatun’a ve on iki sehmi sagīre-i mezbûre Afife’ye ve bâkī beş sehmi sagīr-i mezbûr Abdullah’a isâbeti tahakkukundan sonra zâtları zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan sagīr-i mezbûr Abdullah’ın vâlidesi ve tesviye-i umûruna mansûbe vasiyyesi olan Emetullah Hatun bt. ( ) ile kezâlik müteveffâ-i mezbûrun vâlidesi diğer mezbûre Âişe meclis-i şer‘-i şerîf-i enverde müteveffâ-i mezbûrun zevcesi ve sagīre kızı mezbûre Afife’nin vâlidesi ve tesviye-i umûruna bâ-hüccet-i şer‘iyye mansûbe vasiyyesi olup tereke-i müteveffâ-i [mezbûra] bi’l-verâse ve bi’l-vesâye vâzıʻatü’l-yed olan mezbûr[e] Âişe Hatun tarafından husûs-ı âti’l-beyânda tasdîka vekîl-i sâbitü’l-vekâlesi olan işbu râfiʻü’l-kitâb Mehmed Efendi [80b] b. Ahmed mahzarında herbiri bi’l-verâse ve bi’l-vesâye ikrâr-ı tâm ve takrîr-i kelâm edip müteveffâ-i mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere isâbet eden yirmi dört bin altmış üç akçeyi terekeden olmak üzere müvekkile-i mezbûre Âişe Hatun bi’l-verâse ve bi’l-vesâye def‘ ve teslîm, biz dahi ber-vech-i muharrer meblağ-ı mezbûru yedinden herbirimiz bi’l-verâse ve bi’l-vesâye bi-kadri’l-hısas bi’t-tamam ve’l-kemâl ahz u kabz eyledik, meblağ-ı mezbûrdan müvekkile-i mezbûre Âişe Hatun yedinde ve zimmetinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Rebîʻülâhir sene tisʻa ve hamsîn ve mi’e ve elf, 1159. Şuhûdü’l-hâl: Abdullah Efendi b. Mehmed Efendi, Mustafa Efendi [b.] Mehmed Efendi, es-Seyyid Ahmed [b.] es-Seyyid Mehmed, Halil Çelebi b. İbrahim, Halil Efendi el-Mukayyid.