Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 374 Hüküm no: 315 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karfa köyünden ölen Polo’nun küçük çocuklarına vasi tayin edilmesi Havâss-ı Refîʻa kazâsına tâbi‘ Karfa karyesinde mütemekkin iken bundan akdem hâlik olan Polo v. ( )’nin sulbî sagīr oğulları Kosta ve Manol ile sagīre kızları Andone ve Panayote’nin tesviye-i emirlerine kıbel-i şer‘den bir vasî nasbı lâzım ve mühim olmağın emânet ile ma‘rûf, her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’s-sifr İskerlet v. Lanbo’yu hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri sıgār-ı mezbûrûnun tesviye-i emirlerine vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımelerini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-âşir min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Es-Seyyid Mehmed b. es-Seyyid Mustafa, Halil b. İbrahim, Ahmed Ağa b. Mehmed Efendi, es-Seyyid Ahmed, Muhzırbaşı Mehmed Çelebi b. Abdullah. Dimitraki v. Yanaki, Yorgaki v. Tarandafil, Hürmüz v. Andon, Zafir v. Dimitri.