Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 373 Hüküm no: 314 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf el-Hâc Ahmed Ağa’nın vefât eden Fâtıma Hanım’daki alacağını terekesinden talebi Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Servi Mahallesiʼnde sâkin iken bundan akdem vefât eden Fâtıma Hanım bt. Mustafa Bey’in hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde medîne-i mezbûrede sâkin işbu râfiʻü’l-kitâb Haffâf el-Hâc Ahmed Ağa b. Hasan nâm kimesne meclis-i ma‘kūd-ı mezkûrda müteveffât-ı mezbûrenin zevci ve sadriye sagīre kızı Râbia’nın babası ve tesviye-i umûruna kıbel-i şer‘den mansûb vasîsi olup tereke-i müteveffât-ı mezbûra bi’l-verâse ve bi’l-vesâye vâzıʻu’l-yed olan Mustafa Çelebi b. Hasan mahzarında üzerine da‘vâ ve takrîr-i kelâm edip müteveffât-ı mezbûre Fâtıma Hanım bt. Mustafa Bey b. Abdullah zimmetinde cihet-i karz-ı şer‘îden doksan buçuk guruş hakkım olup hatta müteveffât-ı mezbûre hâl-i hayâtında ve kemâl-i akl [u] sıhhatinde fevtinden beş gün mukaddem cihet-i mezkûreden ol mikdâr guruş zimmetinde bana vâcibü’l-edâ deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla meblağ-ı mezbûru terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den medîne-i mezbûrede hâlâ Câmi‘-i Kebîr imâmı Abdullah Efendi b. Mehmed Efendi ve es-Seyyid Ahmed Ağa b. es-Seyyid Mehmed ve Ali Çelebi b. Abdullah nâm kimesneler li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffât-ı mezbûre Fâtıma Hanım bt. Mustafa Bey b. Abdullah zimmetinde işbu müdde‘î-i mezbûr Haffâf el-Hâc Ahmed Ağa’nın doksan buçuk hakkı olup hatta müteveffât-ı mezbûre hâl-i hayâtında [83a] ve kemâl-i akl [u] sıhhatinde fevtinden beş gün mukaddem cihet-i mezkûreden ol mikdâr guruş müdde‘î-i mezbûr Haffâf el-Hâc Ahmed Ağa’ya zimmetinde vâcibü’l-edâ deyn olduğunu huzûrumuzda kirâren ve mirâren ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an ba‘s olunan Çukadâr Ahmed Ağa ve Muhzır Halil Çelebi ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Cemâziyelevvel sene tisʻa ve hamsîn ve mi’e ve elf, 1159. Şuhûdü’l-hâl: Ahmed Efendi b. Mustafa, es-Seyyid Ahmed b. es-Seyyid Mehmed, el-Hâc Mehmed b. Osman, es-Seyyid Mehmed b. es-Seyyid Ahmed, Ali Çelebi b. Abdullah.