Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 375 Hüküm no: 317 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Beşe’nin vefât eden kardeşi Ömer Beşe’den miras kalan evini satması Havâss-ı Refîʻa kazâsına tâbi‘ Makrihora nâm karyede sâkin iken bundan akdem vefât eden Ömer Beşe b. Mehmed’in li-ebeveyn karındaşı ve hasren [vârisi] Yusuf Beşe b. Mehmed meclis-i şer‘-i şerîf-i enverde işbu râfiʻü’l-kitâb Mehmed Beşe b. Ali mahzarında bi’l-verâse ikrâr ve takrîr-i kelâm edip karındaşım müteveffâ-i mezbûrun ile’l-vefât yedinde mülk ve hakkı idiği müsbet olup karye-i mezbûrede vâki‘ iki tarafdan Hasan Beşe mülkü ve bir tarafdan Hadîka Ahmed Ağa tarlası ve bir tarafdan tarîk-i âm ile mahdûd bir bâb tahtânî oda ve kenîf ve samanhâneyi muhtevî mülk menzil-i mevrûsumu tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm Mehmed Beşe’ye yüz bir guruşa beyʻ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr yüz bir guruşu mezbûr Mehmed Beşe yedinden bi’l-verâse alıp kabz edip baʻde’l-yevm menzil-i mahdûd-ı mezkûr mezbûr Mehmed Beşe’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Cemâziyelâhir sene tisʻa ve hamsîn ve mi’e ve elf, 1159. Şuhûdü’l-hâl: Süleyman Efendi İmâm-ı karye-i mezbûr, Murad Beşe [b.] Yusuf, Ali Beşe [b.] Osman, Mehmed Beşe [b.] Mustafa, el-Hâc Hasan [b.] Yusuf, Halil Efendi el-Mukayyid.