Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 376 Hüküm no: 318 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cırcıroğlu Mehmed’in Alibey köyündeki evini Kurrâ Nukud Vakfı’na istiğlal yoluyla satması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsına tâbi‘ Alibey karyesinde sâkin Cırcıroğlu Mehmed b. Ali nâm kimesnenin sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde kurrâya mevkūfe nukūdun vâkıfı ve mütevellîsi işbu râfiʻü’l-kitâb fahrü’l-eimme el-Hâc Mehmed Efendi b. Mustafa Efendi mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin işbu akd-i meclis olunan karye-i mezbûrede vâki‘ bir tarafdan Zobun Mustafa mülkü ve bir tarafdan imâm veresesi mülkü ve bir tarafdan bey tarla ve bir tarafdan tarîk-i âm ile mahdûd fevkānî üç bâb oda ve bir sofa ve iki kenîf ve müşterek su kuyusu ve bir mikdâr havluyu muhtevî mülk menzilimi cemî‘ tevâbiʻ ve levâhıkıyla tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile yüz elli guruşa mütevellî-i mûmâ-ileyhe beyʻ ve temlîk ve teslîm, ol dahi mâl-ı vakf-ı mezbûr ile vakıf için bi’t-tevliye iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz elli guruşu mütevellî-i mûmâ-ileyh yedinden bi’t-tamam ahz u kabz eyledim, baʻde’l-yevm menzil-i mahdûd-ı mezkûr vakf-ı mezkûr müsteğallâtından oldukdan sonra mütevellî-i mûmâ-ileyh el-Hâc Mehmed Efendi ber-vech-i muharrer müstegallât-ı vakıfdan olan menzil-i mahdûd-ı mezkûru ba‘de’t-tahliyyeti’ş-şer‘iyye otuz guruş muʻaccel-i makbûza ve bir akçe ücret-i müeccel ile târîh-i kitâbdan bi’t-tevliye bana îcâr ve teslîm, ben dahi minvâl-i meşrûh üzere istîcâr ve kabz ve kabûl eylediğimden sonra menzil-i mezkûrun gabnine ve tağrîrine ve mu‘accel-i mezkûra müte‘allika âmme-i de‘âvîden mütevellî-i mûmâ-ileyh el-Hâc Mehmed Efendi’nin zimmetini ibrâ ve ıskāt eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelûlâ li-sene tisʻa ve hamsîn ve mi’e ve elf. Şuhûdü’l-hâl: Es-Seyyid Mehmed b. es-Seyyid Mustafa, es-Seyyid Mehmed b. es-Seyyid Mehmed, Mollâ Ali b. ( ) Bakkāl, el-Hâc İbrahim b. ( ) Bakkāl, Köse Hasan b. ( ) Attâr, Osman Efendi b. ( ) İmâm-ı karye-i mezbûr, Halil Çelebi b. İbrahim, Halil Efendi el-Mukayyid, Hasan Çelebi b. Mehmed.