Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 378 Hüküm no: 320 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin küçük kızına, Salih Beşe’nin annesi Fâtıma bt. Abdullah’ın vasi tayin edilmesi Havâss-ı Refîʻa kazâsında Pirinççi nâm karye sâkinlerinden iken bundan akdem vefât eden Mehmed Beşe b. Mustafa’nın sulbiye sagīre kızı Saime’nin tesviye-i umûruna min-kıbeli’ş-şer‘i’ş-şerîf mansûb vasîsi ammizâdesi Salih Beşe b. Ali nâm kimesne meclis-i şer‘-i hatîr-i lâzımü’t-tevkīrde müteveffâ-i mezbûrun zevce-i metrûkesi ve sagīre-i mezbûrenin vâlidesi işbu bâ‘isetü’l-kitâb Fâtıma bt. Abdullah nâm hatun mahzarında takrîr-i kelâm edip baʻzı aʻzâr hasebiyle umûr-ı vesâyeti görmekde kemâl-i aczim olmağla rızâm ile vesâyetinden keff-i yed eyledim dedikde umûr-ı vesâyet uhdesinden gelmeğe kādire idiği ihbâr-ı Müslimîn ile lede’ş-şer‘i’l-kavîm mütebeyyin olan sagīre-i mezbûrenin vâlidesi mezbûre Fâtıma Hatun’u hâkim-i muvakki‘-ı sadr-ı kitâb efendi hazretleri sagīre-i mezbûrenin tesviye-i umûrunu rü’yete vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi baʻde’l-kabûl ve hıdemât-ı lâzımesini alâ-vechi’l-ihtimâl görmeğe müteʻahhide olmağın mâ-vaka‘a bi’t-taleb ketb olundu. Fi’l-yevmi’s-sâdis min-Cemâziyelâhir sene 1159. Şuhûdü’l-hâl: Ahmed Efendi b. Mustafa Efendi, es-Seyyid Mehmed [b.] es-Seyyid Mustafa, es-Seyyid Ahmed [b.] es-Seyyid Mehmed, Mehmed Efendi [b.] Muslihiddin, Halil Efendi el-Mukayyid.