Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 378 Hüküm no: 321 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin küçük kızına vasi tayin edilen annelerinin önceki vasiden çocuğun hissesini teslim alması Havâss-ı Refîʻa kazâsında Pirinççi nâm karye sükkânından iken bundan akdem vefât eden Mehmed Beşe b. Mustafa’nın zevce-i metrûkesi ve sagīre kızı Saime’nin bâ-hüccet-i şer‘iyye tesviye-i umûruna mansûbe vasîsi olup zâtı ta‘rîf-i şer‘î ile mu‘arrefe olan Fâtıma bt. Abdullah nâm hatun meclis-i şer‘-i hatîr-i lâzımü’t-tevkīrde sagīre-i mezbûrenin ammizâdesi olup işbu bâ‘isü’l-kitâb Salih Beşe b. Ali nâm kimesne mahzarında bi’l-vesâye ikrâr ve takrîr-i kelâm edip mezbûr Salih Beşe sagīre-i mezbûrenin bundan akdem vasîsi iken baʻzı aʻzâr hasebiyle umûr-ı vasiyyeti rü’yetde acz ve rızâsıyla kasr-ı yed ve kıbel-i şer‘den sagīre-i mezbûrenin tesviye-i umûrunu görmek üzere ben vasî nasb u ta‘yîn olunmağla sagīre-i mezbûre Saime’ye babası müteveffâ-i mezbûr Mehmed Beşe’den defter-i kassâm-ı askerî mantûkunca isâbet ve intikāl eden dört bin üç yüz akçe hisse-i irsiyyesini mezbûr Salih Beşe meclis-i şer‘de bana def‘ ve teslîm, ben dahi vesâyetim hasebiyle yedinden tamamen ahz u kabz eyledim, müteveffâ-i mezbûrun kalîl ü kesîr terekesinden mezbûr Salih Beşe yedinde ve zimmetinde bir akçe ve bir habbe bâkī kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Cemâziyelâhir li-sene tisʻa ve hamsîn ve mi’e ve elf, 1159. Şuhûdü’l-hâl: Eş-Şâhidûnü’s-sâbıkūn.