Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 42 Hüküm no: 16 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terohi isimli Nasraniyenin bazı eşyalarını damadı Dikici Mikail’e sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkine olup şahsı vech-i şer‘î üzere mu‘arrefe olan Terohi bt. Artin nâm Nasrâniye meclis-i şer‘-i hatîr-i lâzimü’t-tevkīrde dâmâdı işbu râfi‘ü’r-rakīm Dikici Mikail v. Vartan nâm zimmî muvâcehesinde bi-tav‘ihâ ikrâr ve takrîr-i kelâm edüp akd-i âti’z-zikrin vukū‘ına değin yedimde emlâkımdan olup eşyâmdan üç aded tencere ve dört aded minder ve dört aded beledî yasdık ve iki aded döşek ve iki aded yorgan ve iki aded beyaz minder kılıfımı tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin müşterî-i merkūm Mikail zimmîye yirmi guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eylediğinden sonra semeni olan meblağ-ı mezkûr yirmi guruşun mutâlebesine müte‘allıka âmme-i da‘vâdan müşterî-i merkūm Mikail zimmînin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim fîmâ-ba‘d eşyâ-i muharrere-i mezkûrda vechen mine’l-vücûh ve sebeben mine’l-esbâb kat‘â alâka ve medhalim kalmayup müşterî-i merkūm Mikail zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î ve yine mukırra-i mersûme Terohi Nasrâniye meclis-i mezkûrda ikrâr ve takrîr-i kelâm edüp işbu dâmâdım merkūm Mikail zimmî zimmetinde cihet-i karz-ı şer‘îden yüz otuz sekiz guruş alacak hakkım olup meblağ-ı mezkûr yüz otuz sekiz guruş hakkımı târîh-i vesîkada merkūm Mikail zimmîden tamâmen ahz ü kabz eyledim fîmâ-ba‘d meblağ-ı mezkûrdan merkūm Mikail zimmî zimmetinde bir akçe ve bir habbe bâkī kalmayup hukūk-ı mezkûra müte‘allıka âmme-i de‘âvî ve kâffe-i mutâlebât ve eymân-ı muhâsamâtdan mesfûr Mikail zimmînin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mâ-hüve’l-vâki‘ bi’t-taleb ketb olundu. Tahrîan fi’l-yevmi’s-sânî min-Recebi’l-ferd li-sene semân ve seb‘în ve mi’ete ve elf. Şuhûdü’l-hâl: el-Hâc Osman Ağa, Süleyman Ağa b. Ahmed, Hasan Usta b. Ahmed, Hüseyin Beşe b. Mehmed, Berber Hüseyin Beşe, Serdâr Mehmed Ağa b. Ali, Hüseyin Beşe b. Musa, Ahmed Efendi. Ohan v. Marat, Avak v. Safail, Aci Sahak v. ( ) Kargacıoğlu Bogos, Aci Barok v. Gabril