Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 140 Hüküm no: 169 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal ve tevabii mukataasının bir seneliğine Süleyman Ağa’ya iltizam olunduğu Bâ‘is-i tahrîr-i hurûf oldur ki Hâlâ Mukāta‘a-i Haremeyn-i şerîfeyn’den Gekbûze’de vâki‘ merhûm ve mağfûrun-leh Sultân Orhan Gāzî -aleyhi rahmetü’l-Bârî- hazretlerinin câmi‘-i şerîfi evkāfı olup medîne-i Üsküdar’a muzâfe Kartal ve tevâbi‘i mukāta‘asının nısf hisse-i mâlikâneye bâ-berat-ı şerîf-i âlîşân mutasarrıf olduğum nısf hissemi işbu bin yüz seksen dört senesi Martı’na mahsûb olmak üzere işbu dârende-i temessük Süleyman Ağa’ya sene-i sâbıkı üzere bin altı yüz yirmi beş guruşa der-uhde ve ilzâm ol dahi iltizâm ve kabûl edüp bedel-i iltizâm olan meblağ-ı mezbûru ber-vech-i peşîn tarafımıza teslîm eyleyüp gerekdir ki mûmâ-ileyh sene-i merkūmenin Martı ibtidâsından Şubat’ı gāyetine değin zabt u rabt eyleyüp hâsıl olan a‘şâr-ı şer‘iye ve rüsûmât-ı örfiye ve tapu-yı zemîn ve resm-i arûsâne ve cürm ü cinâyet ve sâir her ne ise sene-i merkūmenin evvelinden âhirine değin hâsılâtını cem‘ ü tahsîl ve zabt u rabt edüp tarafımızdan ve taraf-ı âhardan ferd-i vâhid dahl ü ta‘arruz eylemeye. Sene 1184 an-Mart ilâ-Şubat Seyyid Mehmed Mutasarrıf-ı nısf hisse-i mâlikâne-i mezbûre.