Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 141 Hüküm no: 113 Orijinal metin no: [13a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emet[ullah] Hatun’a aid olup kendisinin izni olmadan Zeyneb Hatun tarafından Neslihan Hatun’a borç karşılığı rehin verilen ulûfe berâtının iâdesi Maʻrûz; İşbu bâʻisetü’l-iʻlâm Emet[ullah] nâm hatun ihzâr-ı şerʻ etdirdiği Neslihan nâm hatundan işbu hâzır bi’l-meclis Zeyneb nâm hatun mezbûre Neslihan’dan istidâne eylediği elli guruş deyni mukābelesinde iznimsiz benim ulûfe berâtımı mezbûre Neslihan yedine rehin olmak üzere vazʻ etmekle zikr olunan ulûfe berâtımı mezbûre Neslihan’dan taleb ederim deyü daʻvâ etdikde mezbûre Neslihan mârru’z-zikr berât yedinde olduğunu ikrâr lâkin mezbûre Zeyneb istidâne eylediği meblâğ-ı deyn-i mezbûr mukābelesinde zikr olunan berâtı müddeʻiye-i mezbûrenin izniyle rehin vazʻ etmiş idi deyü eylediği defʻini müddeʻiye-i mezbûre Emetullah münkire olup ve mezbûre Neslihan müddeʻâsını isbâtdan izhâr-ı acz edip halfe dahi tâlibe olmamağla zikr olunan ulûfe berâtını müddeʻiye-i mezbûreye teslîme mezbûre Neslihan’a tenbîh-birle Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Fî 6 Rebîʻülevvel sene 1160