Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 143 Hüküm no: 119 Orijinal metin no: [13b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sezai Yusuf Efendi’nin tımar gelirlerini tahsil etmek üzere vekil tayin ettiği Mustafa’yı azlettiği, reâyâdan talepte bulunmasına mani olunması gerektiği Maʻrûz; Ohri kazâsında Ulaşca ve tevâbiʻi karyelerinin ber-vech-i tımar mutasarrıfı olan dîvân-ı âlî kâtiplerinden sâhib-i arzuhâl Sezai Yusuf Efendi b. Sinan meclis-i şerʻ-i hatîrde Topçular karyesinde sâkin tımarı reʻâyâsından olup derûn-ı arzuhâlde mezkûrü’l-ism Mustafa nâm mühtedî muvâcehesinde bin yüz kırk dokuz senesi Martı ibtidâsından Şubatı gāyetine değin onda bir ücret kavliyle tımar-ı mezbûrda vâkiʻ mahsûlâtı zabt etmek üzere vekîl edip sene-i mezbûrede vâkiʻ olan mahsûlâtından makbûzu olan yüz yirmi guruşdan on guruşu ücretine mahsûb bâkī yüz on iki guruşu işbu yedimde olan iʻlâm nâtık olduğu üzere bana baʻde’t-teslîme mezbûr Mustafa mühtedîyi vekâletden azl etmiş idim lâkin mezbûr Mustafa mühtedî yine vekâlet-i mezbûreye binâʼen tımarım reʻâyâsından hilâf-ı şerʻ on iki keyl tereke bâkī kalmışdır ben alırım deyü reʻâyâmı rencîdeden hâlî olmamağla tımarım reʻâyâsına dahl etmemek üzere tenbîh olunmak murâdımdır dedikde mezbûr Mustafa mühtedî ber-vech-i muharrer (...) etmekle mûcebince vekâlet-i sâbıkāya binâʼen mezbûr Yusuf Efendi’nin tımarı mahsûlâtın (...) ve kabz etmemek üzere mezbûr Mustafa mühtedîye tenbîh olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 16 Rebîʻülevvel sene 1160