Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 145 Hüküm no: 122 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Yanaki’nin ölen Celep Cevri zimmîye olan borcunu vârislerine ödemesi Maʻrûz; Vilâyet-i Rumeli’nde Şehirköy kazâsına tâbiʻ Ragodoş karyesinden olup medîne-i Eyüb’de Fodulacıoğlu el-Hâc Ahmed’in selhhânesinde misâfiren sâkin iken bundan akdem hâlik olan Celep Cevri nâm zimmînin verâseti sâlifü’z-zikr karye-i mezbûrede mütemekkine zevce-i metrûkesi Petro ve anası Milo ile li-ebeveyn er karındaşı Dero ve sulbiye sagīre kızları Astana ve Rağna’ya baʻde’l-inhisâr mezbûr Dero zimmî kendi tarafından asâleten ve mezbûretân Petro ve Milo nâm Nasrâniyeler taraflarından bâ-hüccet-i şerʻiyye sâbitü’l-vekâle vekilleri olmağla vekâleten ve sagīretân-ı mezbûretânın tesviye-i umûrlarına bâ-hüccet-i şerʻiyye vasîleri olan hâmilü’l-iʻlâm mesfûr Dero zimmî vesâyeten meclis-i şerʻde kasab tâifesinden ihzâr etdirdiği Yanaki nâm zimmî ile terâfuʻ olduklarında mezbûr Yanaki zimmî hâlik-i mesfûr Cevri zimmî yedinden iştirâ ve kabz eylediği koyun semeninden yetmiş sekiz guruş elli yedi akçe hakkı olup kable’l-ahz hâlik olmağla meblâğ-ı mezbûru bi’l-verâse ve bi’l-vekâle ve bi’l-vesâye taleb ederim deyü daʻvâ etdiğinde ol dahi cihet-i mezbûreden hâlik-i mesfûra ol kadar akçe deyni olduğunu ikrâr lâkin meblâğ-ı mezbûru hâlik-i mesfûra hayatında edâ etmiş idim deyü eylediği defʻini beyâna kādir olmayıp tahlîfe dahi tâlibe olmamağın mûcebince meblâğ-ı mezbûr yetmiş sekiz guruş elli yedi akçeyi müddeʻi-i mesfûr Dero zimmîye edâ etmek üzere mesfûr Yanaki zimmîye tenbîh olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 25 Rebîʻülevvel sene 1160