Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 145 Hüküm no: 123 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman mezarlığında koyun otlatarak etrafı kirleten Panos’un evinin Müslümana satılarak mezarlığın temiz tutulması Maʻrûz; Medîne-i Eyüb’de Zeyneb Hatun Mahallesi ahâlîsi ashâbı arzuhâl [edip] İmam Mehmed Efendi ve Müezzin Mehmed Halîfe ve Abdullah ve Mehmed Çelebi ve el-Hâc Mustafa ve el-Hâc Mehmed ve Mustafa Çelebi ve Mehmed ve ol havâlîde olan makābir-i Müslimînin Eyüb Vakfı’ndan vazîfe ile korucusu olan İsmail Efendi medîne-i Eyüb mahkemesine ihzâr etdirdikleri Panos v. Haçok nâm zimmî muvâcehesinde mahalle-i mezbûre fi’l-asl Müslimîn Mahallesi olup içlerinde aslâ kefere sâkin olduğu yoğiken mesfûr Panos bundan akdem mahalle-i mezbûrede sâkin Berber İsmail’in menzilini iştirâ ve üç yüz mikdârı mevâşîsini etrâfında olan makābir-i Müslimînde raʻy ve makābir-i Müslimîn tahrîb ve telvîs eder deyü bi-tarîkı’l-hasbe alâ-tarîkı’ş-şehâde haber verdiklerinden sonra mesfûr Panos dahi ber-vech-i muharrer mukırr ve muʻterif olmağla menzil-i mezbûru bir Müslime beyʻ edip baʻde’l-yevm makābir-i Müslimîne devâb ve mevâşî idhâl etmemek üzere tenbîh ve tescîl olundukdan sonra ahâlî-i mezbûrûn gerek mesfûr Panos ve gerek sâir çoban ve kasab ve gayrîler makābir-i Müslimîne devâb ve mevâşî idhâlinden menʻi nâtık emr-i âlî sudûrunu istidʻâ-yı inâyet eyledikleri bi’l-iltimâs huzûr-ı âlîlerine iʻlâm olundu. Fî 21 Rebîʻülevvel sene 1160