Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 146 Hüküm no: 125 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haslar Beytülmâl Emini İbrahim’in Kosta zimmîden, ölen Hristo v. Kirko’dan satın aldığı iddiâ olunan enginar fidanlarının bedelini talep etmesinin uygun olmadığı Maʻrûz; Hâslar beytülmâl Emîni olan İbrahim nâm kimesne Eyüb mahkemesine ihzâr etdirdiği hâmilü’l-iʻlâm Kosta v. Milo nâm zimmî ile terâfuʻlarında Yenikapı Mevlevîhâne hâricinde vâkiʻ Uzun Dolap Bostanı demekle maʻrûf bostânda hâlik olan Hristo v. Kirko nâm zimmî kendisine üç gün mukaddem hendek ve iki kale bedeni derûnunda mevcûd olan beş bin enginar fidanını mesfûr Kosta’ya on bin akçeye beyʻ ve temlîk ve teslîm ve kabz-ı semen etmişdir deyü ikrâr edip ikrârı hüccet dahi olunmuş idi. Hâlik-i mesfûr Hristo meblâğ-ı mezbûru kabz eylediğini ikrârında kâzib olmağla meblâğ-ı mezbûru bi’l-emâne mesfûr Kosta zimmîden taleb ederim deyü ol dahi hâlik-i mesfûr Hristo ikrârı mezbûrunda kâzib olduğunu inkâr edip emîn-i mezbûrun talebiyle hâlik-i mesfûr Hristo zimmî vech-i muharrer üzere ikrârında kâzib olmadığına mesfûr Kosta zimmî tahlîf olunmağla emîn-i merkūm vech-i muharrer üzere meblâğ-ı mezbûr mütâlebesiyle mesfûr Kosta zimmîye bî-vech muʻarazadan menʻ olunduğu tescîl olunup bi’l-iltimâs huzûr-ı âlîlerine iʻlâm olundu. Fî 27 Rebîʻülevvel sene 1160