Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 151 Hüküm no: 137 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Beşe’nin vefât eden karısı Ümmü Gülsüm’ün babası Salih’den talep ettiği alacak davasında haksız olduğu Maʻrûz; Medîne-i Eyüb’de Otakçılar Mahallesi sükkânından Seyyid Ali Beşe nâm kimesne işbu bâʻisü’l-iʻlâm Salih nâm kimesne ile terâfuʻlarında mezbûr Salih’in kızı zevcem müteveffiye Ümmü Gülsüm’den müntakil vakıf menzil oğlum sagīr Mahmud ve kızım sagīre Fâtıma ile zevc-i âharın firâşından hâsıl âhar sagīr oğlu Mustafa’ya ale’l-iştirâki’s-seviyy baʻde’l-intikāl mezbûr Salih bi’l-izni’ş-şerʻî bâ-maʻrifet-i mütevellî menzil-i vakf-ı mezbûru bundan akdem yüz elli guruş bedel-i makbûza bana fâriğ olmağla bedel-i ferağdan kızım sagīre-i mezbûre Fâtıma hissesine âid olan elli guruş ile kezâlik fevt olan oğlum sagīr Mahmud’un verâseti ceddesi işbu Âişe Hatun’a ve bana münhasıra olmağla bedel-i ferağdan müteveffâ-i mezbûr Mahmud’un hissesine âid olan elli guruşdan techîz ve tekfîn mesârifinden sonra bâkī kalan kırk iki guruşdan bana isâbet eden otuz beş guruş ki cemʻan seksen beş guruş bi’l-velâye ve’l-verâse mezbûr Salih’den taleb ederim deyü eylediği daʻvâsını mezbûr Salih baʻde’l-inkâr müddeʻî-i mezbûr Seyyid Ali Beşe müddeʻâsını isbâtdan izhâr-ı acz edip ve halfe dahi tâlib olmamağla müddeʻî-i mezbûr Seyyid Ali Beşe mezbûr Salih ile bilâ-beyyine ve bilâ-yemîn bî-vech muʻârazadan menʻ-birle Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî min-şehri Rebîʻi’l-âhir li-sene sittin ve miʼe ve elf.