Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 155 Hüküm no: 143 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkcı Hüseyin ile kardeşi Ali Beşe’nin Ali b. Osman tarafından darbedildiklerinin ispatlandığı Maʻrûz; Bâʻisü’l-iʻlâm kayıkcı tâifesinden Hüseyin ve karındaşı Ali Beşe b. Mustafa nâm kimesneler Vâlidesarayı ustası mübâşeretiyle medîne-i Eyüb mahkemesine ihzâr etdirdikleri yine kayıkcı tâifesinden diğer Ali b. Osman muvâcehesinde mezbûr diğer Ali târîh-i iʻlâm günü kable’z-zuhr medîne-i mezbûrede Bostan İskele[sinde] kayık gergisi taʻbîr olunur haşebin keskin tarafıyla benim depeme bi-gayr-ı hakkın amden darb ve şec eyledi deyü mezbûr Hüseyin eylediği daʻvâsını ve kezâlik vakt-i mezkûrda mahâll-i merkūmda âlet-i mezkûr ile bi-gayr-ı hakkın benim dahi başımın sol tarafına amden darb ve şec eyledi deyü (...) karındaşı mezbûr Ali Beşe dahi eylediği daʻvâlarını vech-i şerʻî üzere isbât etmeleriyle mûcebiyle berʼ-i tâm husûlüne tevkīf-birle tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’l-hâdî aşer min-Rebîʻi’l-âhir sene sittin ve miʼe ve elf.