Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 155 Hüküm no: 142 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuruşna bt. Papa Dimitri v. Yani ile Laskari aralarındaki verâset ve alacak verecek davasında anlaşmaya vardıkları Maʻrûz-ı dâʻî-i Devlet-i aliyyeleridir ki; Arzuhâl sâhibesi Kuruşna bt. Papa Dimitri v. Yani nâm Nasrâniye’nin tarafından zikr-i âtî husûsu taleb ve daʻvâ ve ahz ü kabz ve îsâle ve sulh ve ibrâya sâbitü’l-vekâle vekîli olan Panayot nâm zimmî meclis-i şerʻde derûn-ı arzuhâlde ismi mastûr olan Laskari nâm zimmî muvâcehesinde müvekkilem mesfûre Kuruşna’nın mülkü olup kıymetleri cemʻan dokuz bin dokuz [yüz] seksen iki buçuk guruşa bâliğ Balat hâricinde yalı taʻbîr olunur menzil ve İstanbul’da Karaman kurbünde nısf hâne ve bâ-defter bir elmas gerdan[lık] ve bir cevâhir bilezik ve dört elmas yüzük ve iki su samuru kürk ve bir nâfe kürk ve bir top dibâ ve bir altun bilezik ve iki çift zümrüt küpe ve on sekiz miskāl inci ve dört buçuk vakıyye sim ve bir cevâhir yüzük ve bir altun sâʻati müvekkilem mesfûre tarafından işbu mesfûr Laskari vekâleten âhara beyʻ ve esmânından düyûn-ı müteferrikayı verip bâkī bin beş yüz guruş zimmetinde kalmışdır taleb ederim deyü bi’l-vekâle daʻvâ ol dahi baʻde’l-inkâr tavassut-ı muslihûn ile vekîl-i mesfûr Panayot daʻvâ-yı mezbûresinden mesfûr Laskari ile bin guruş bedel-i makbûza sulh ve bedel-i sulhü baʻde’l-kabz husûs-ı mezkûr daʻvâdan ibrâ-i müvekkileye izâfetle mesfûr Laskari ile karındaşı Espandot’un veresesinin zimmetlerini ibrâ ol dahi bedel-i sulhden müvekkile-i mezbûre Kuruşna ve vekîl-i mesfûrun zimmetlerini ibrâ ve birbirleriyle katʻ [ı nizâʻ] etdikleri tescîl olunup mübâşiri el-Hâc Ahmed Haseki iltimâsıyla huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’l-âşir min-Rebîʻi’l-âhir sene sittin ve miʼe ve elf