Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 156 Hüküm no: 145 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır kadılarından Mehmed Efendi’nin borcunu ödemesi Mahmiye-i İstanbul’da Atpazarı’nda Mehmed Paşa Mahallesiʼnde sâkin kuzâtdan bâʻisü’l-iʻlâm Hasan Efendi b. Süleyman medîne-i Eyüb mahkemesinde meclis-i şerʻ-i hatîrde kuzât-ı Mısriye’den olup medîne-i mezbûrede Takyecibaşı Mahallesiʼnde sâkin Mehmed Efendi b. İbrahim nâm kimesne muvâcehesinde mezbûr Mehmed Efendi zimmetinde cihet-i karz-ı şerʻîden bâ-temessük iki yüz altmış dokuz guruş hakkım vardır taleb ederim deyü daʻvâ, mezbûr Mehmed Efendi cevâbında cihet-i mezbûreden müddeʻî-i mezbûr zimmetinde iki yüz altmış guruş bâ-temessük deynim vardır deyü ikrâr lâkin hakīkatte deynim olmayıp kâziben ikrâr edip temessük-ı mezbûru vermiş idim deyicek mezbûr Mehmed Efendi ikrârında kâzib olmadığına mezbûr Mehmed Efendi’nin talebiyle müddeʻî-i merkūm Hasan Efendi baʻde’t-tahlîfü’ş-şerʻî mûcebiyle meblâğ-ı mezbûr iki yüz altmış guruşu müddeʻî-i mezbûr Hasan Efendi’ye edâ ve teslîme merkūm Mehmed Efendi’ye baʻde’t-tenbîh münkir olduğu dokuz guruşu isbât içün müddeʻî-i mezbûr şâhide havâle olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’s-sâmin min-Rebîʻi’l-âhir sene sittin ve miʼe ve elf.