Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 157 Hüküm no: 146 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemal v. Yasef’in Molla Ahmed’e olan borcunu ödemesi Maʻrûz; Havâss-ı refîʻa kazâsına muzâfe kasaba-i Hasköy’de Turşucu Mahallesiʼnde sâkin bâʻisü’l-iʻlâm Molla Ahmed nâm kimesne medîne-i Eyüb mahkemesine ihzâr etdirdiği Kemal v. Yasef nâm Yahûdi ile terâfuʻ etdiklerinde mesfûr Kemal Yahûdi zimmetinde yedimden iştirâ ve kabz eylediği âlâtıyla kayık semeninden yetmiş beş guruş ve eşyâ-i mebîʻa semeninden on sekiz guruş ki cemʻan doksan üç guruş hakkımdan kırk guruşunu ahz u kabz edip bâkī elli üç guruş zimmetinde kalmağla taleb ederim deyü daʻvâ eyledikde ol dahi baʻde’l-ikrâr lâkin ancak zimmetimde edâsı lâzım deynim olan kırk guruşdan mâʻadâsını müddeʻî-i mezbûr Molla Ahmed’e edâ etmiş idim deyü eylediği defʻini ityân-ı beyyineden izhâr-ı acz edip mesfûr Kemal Yahûdi talebiyle müddeʻî-i mezbûr baʻde’l-half mûcebiyle meblâğ-ı bâkī-i mezbûr elli üç guruşu müddeʻî-i mezbûra edâ ve teslîme mesfûr Kemal Yahûdi’ye tenbîh olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-âşir min-Rebîʻi’l-âhir sene sittin ve miʼe ve elf.