Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 171 Hüküm no: 179 Orijinal metin no: [19b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü Gülsüm Hatun’un kocası Mustafa’nın emriyle harcadığı paranın kendisine iâdesi Maʻrûz; Medîne-i Eyüb’de Takyeci Mahallesi sâkinelerinden bâʻisetü’l-iʻlâm Ümmü Gülsüm’ün karındaşı ve tarafından zikr-i âtî husûslara sâbitü’l-vekâle vekîli olan Mehmed Ağa nâm kimesne müvekkile-i mezbûrenin hâlâ zevci Mustafa nâm kimesne ile terâfuʻlarında müvekkilem mezbûre Ümmü Gülsüm işbu zevci mezbûr Mustafa’nın bi-şartü’r-rücûʻ emriyle mesâlih-i maʻlûmesine harc ve sarf eylediği yüz on guruş masrûfunu zevc-i mezbûr Mustafa’dan alıverilmek matlûbumdur deyü bi’l-vekâle daʻvâ [20a] etdikde mezbûr Mustafa dahi zevcem müvekkile-i mezbûrenin emrime binâʼen mesâlihime masrûfu ancak altmış guruşdur deyü ikrâr, ziyâdeyi baʻde’l-inkâr ve meblâğ-ı mezbûr altmış guruşun yirmi sekiz guruşu zimmetimde deynim olup mâʻadâ otuz iki guruşunu edâ etmiş idim deyicek vekîl-i mezbûr ziyâdeyi isbât etmek üzere mezbûr Mustafa otuz iki guruş teslîmini isbât etmek üzere tarafeyn beyyineye havâle olunup meblâğ-ı bâkī yirmi sekiz guruşu müddeʻiye-i mezbûrenin vekîli Mehmed Ağa’ya edâ ve teslîm etmek üzere iʻtirâfına binâʼen zevc-i mezbûr Mustafa’ya tenbîh-birle Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’t-tâsiʻ min-Cemâziyelevvel li-sene sittin ve miʼe ve elf.