Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 171 Hüküm no: 178 Orijinal metin no: [19b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Luka’nın ölen Apostol’un terekesinden hak talebinde bulunmasının meşru olmadığı Maʻrûz-ı dâʻî-i Devlet-i aliyyeleridir ki; Sâhib-i arzuhâl Kiryako v. Luka nâm zimmî derûn-ı arzuhâlde mezkûr Ziyo bt. Panayot nâm Nasrâniye ile terâfuʻlarında Havâss-ı refîʻa kazâsına tâbiʻ Avas karyesi sükkânından Apostol hâlik olup zevcesi mezbûre Ziyo nâm Nasrâniye ile sulbiye sagīre kızı Atnagrade’yi? terk etdikde terekesini mesfûre Ziyo ahz ü kabz edip ben hâlik-i mezbûrun anasının li-ebeveyn er karındaşının oğlu olmamla tereke-i makbûzadan hisse-i irsiyeyi taleb ederim deyü eylediği daʻvâsı takrîrine göre meşrûʻa olmayıp verâsetden mahcûb olmağla mesfûre Ziyo Nasrâniye’ye suâl dahi teveccüh eylemediği huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin min-Cemâziyelevvel li-sene sittin ve miʼe ve elf.