Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 172 Hüküm no: 181 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekci fırını yanaşması Abdullah ile ustası Ali Beşe’nin aralarındaki sözleşmeyi iptal ettikleri Maʻrûz; Medîne-i Eyüb’de Çavuş Kasım Mahallesiʼnde vâkiʻ çörekci fırınında yanaşma Abdullah b. Mustafa fırın-ı mezkûr ustası bâʻisü’l-iʻlâm Ali Beşe b. Mehmed muvâcehesinde mezbûr Ali Beşe beni bir sene tamamına dek on guruş ücret kavliyle nefsimi îcâr ol dahi ber-vech-i muharrer istîcâr ve kabûl ve beş ay mürûrunda beynimizde olan akd-i icâreyi rızâmız ile işbu târîh-i iʻlâmdan feshetmekle zimmetinde müctemiʻ olan beş ayda ücretim mukābili beş yüz akçe mütâlebesinden mezbûr Ali Beşe’nin zimmetini ibrâ eyledim deyü ikrâr ol dahi ber-vech-i muharrer tasdîk eylediği tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis min-Cemâziyelevvel sene sittin ve miʼe ve elf.