Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 173 Hüküm no: 182 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ile kardeşi Ümmü Gülsüm Hatun’un aralarındaki miras ve borç davalarında anlaşmaya vardıkları Maʻrûz; Sâhib-i arzuhâl Mustafa nâm kimesne meclis-i şerʻde hemşiresi olup derûn-ı arzuhâlde mesfûratu’l-ism olan Ümmü Gülsüm nâm hatun muvâcehesinde mezbûre Ümmü Gülsüm zimmetinde cihet-i emânetten olan iki yüz guruş hakkımdan bâkī yüz altmış guruş ve yine bi-tarîkı’l-emâne teslîm eylediğim otuz fındık nısfiyesi altun ve babam müteveffâ el-Hâc Ahmed’in metrûkâtından bâ-defter-i kassâm iştirâ eylediği eşyâ bahâsından mezbûre Ümmü Gülsüm’ün zevci müteveffâ Mehmed Beşe zimmetinde olan otuz üç bin akçeden teveccüh eden hisse-i irsiyemi tereke-i vâfiyesinden edâ eylemek üzere mezbûre Ümmü Gülsüm Hatun’dan taleb ederim deyü tasaddî eylediğim daʻvâ-yı mezbûremden vesâtet-i muslihîn ile hemşirem mezbûre Ümmü Gülsüm ile an-inkâr yirmi iki guruş bedel-i makbûza sulh-i sahîh ile sulh olup cihet-i emânet ve cihet-i mîrâs ve hukūk-ı sâireden târîh-i iʻlâma gelince beynlerimizde cereyân eden ahz ü iʻtâya müteʻallika âmme-i deʻâvî [ve] mutâlebâtdan her birimiz âharın zimmetlerini ibrâ ve iskāt edip bundan akdem Câmiʻ-i kebîr Mahallesi’nde maʻlûmü’l-hudûd vakıf bahçeyi mezbûre Ümmü Gülsüm’e vefâen ferağ etmiş idim deyü eylediğim daʻvâmda mübtil olup ferağ-ı katʻî ile ferâgat etmiş idim deyü ikrâr ol dahi tasdîk eylediği mübâşiri iltimâsıyla Eyüb mahkemesinde tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâlis min-Cemâziyelevvel sene sittin ve miʼe ve elf.