Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 181 Hüküm no: 203 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kelleziz v. Sinan ile Mehmed b. Yusuf’un öküz kiralama hususunda aralarında oluşan ihtilâfı giderdikleri Maʻrûz; Havâss-ı aliyye kazâsına tâbiʻ kasaba-i Hasköy’de mütemekkin Kelleziz v. Sinan? nâm zimmî meclis-i şerʻde bâʻisü’l-iʻlâm Mehmed b. Yusuf muvâcehesinde mezbûr Mehmed’e mülküm olan bir çift kara sığır öküzlerimi târîh-i iʻlâmdan altı ay tamamına değin besleyip ve esnâ-i müddetde baʻzı iktizâ eden hizmetinde istiʻmâl etmek üzere altı guruş ücret kavliyle yedine teslîm ve ücret-i merkūmeyi peşin ahz edip hâlâ müddet-i merkūme hulûlünde öküzleri bana teslîm eylediğinde bir reʼs öküzüm muʻtâddan ziyâde hizmetinde istiʻmâl eylediğine binâʼen zebûn olup kıymetine noksan terettüb eyledi deyü daʻvâya tasaddî eylediğimde ol dahi benden ziyâde ücret talebinde olmuş idi. El-hâletü hâzihî her birimiz âharın zimmetini ibrâ eyledik deyü ikrâr ol dahi ber-vech-i muharrer tasdîk eylediği Eyüb mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis aşer min-Cemâziyelevvel sene sittin ve miʼe ve elf. 1160