Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 182 Hüküm no: 205 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramanoz’un Yorgi’den aldığı parayı iâde etmesi Maʻrûz; Sâhib-i arzuhâl Yorgi nâm zimmî çavuş kulları mübâşeretiyle medîne-i Eyüb mahkemesine ihzâr-ı şerʻ etdirdiği derûn-ı arzuhâlde mezkûrü’l-ism Ramanoz nâm zimmî ile terâfuʻlarında mezbûr Ramanoz’un emr ve tevkîliyle Yedikule hâricinde vâkiʻ meyhânesinde semen-i misliyle beyʻ ve kabz eylediğim ham sirke semeninden yüz seksen sekiz guruşu nâʼim iken koynumdan taʻaddî ve taksîrimsiz sirka olunup zâyiʻ oldukdan sonra meblâğ-ı mezbûru benden cebren bi-gayr-ı hakkın ahz eyledi deyü daʻvâ eyledikde mezbûr Ramanoz cevâbında meblâğ-ı mezbûrun yüz guruşunu kendi malım olmak üzere ikrâr ve bana teslîm eyledi deyü baʻde’d-defʻ ve’l-inkâr bâkī seksen sekiz guruşu zâyiʻ olduğunu iddiʻâ-yı deyn tasdîk eylemeyip ahz etmiş idim dedikde mezbûr Yorgi husûs-ı mezbûrda yemînle tasdîk olunur ümenâdan olmağla mezbûr Ramanoz talebiyle gıbbe’t-tahlîfü’ş-şerʻî mûcebiyle meblâğ-ı mezbûr seksen sekiz guruşu mezbûr Yorgi’ye red ve teslîme mezbûr Ramanoz zimmîye baʻde’t-tenbîh ikrâr daʻvâsıyla olan defʻ-i meşrûhu beyâna havâle olunduğu huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’s-sâmin aşer min-Cemâziyelevvel sene 1160