Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 182 Hüküm no: 206 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foti v. Anastaş’ın ölen Mihal v. Yorgo’ya olan borcunu vârislerine ödemesi Maʻrûz; Havâss-ı refîʻa kazâsına tâbiʻ Karfa karyesinden olup vilâyet-i Rumeli’nde Gelibolu kazâsına muzâfe Şehirköy nâhiyesine tâbiʻ Kaloz karyesinde mütemekkin iken bundan akdem hâlik olan Mihal v. Yorgo zimmînin verâseti sulbiye kebîre kızları Evine ve Elina Nasrâniyeler ile sulbî sagīr oğlu Bakami’ye baʻde’l-inhisâr ashâb-ı arzuhâl mezbûre Evine Nasrâniye asâleten ve mesfûre Elina Nasrâniye tarafından husûs-ı âti’l-beyânda sâbitü’l-vekâle vekîli olan âmmetesi Gonca bt. Anaştaş Nasrâniye vekâleten ve kezâlik sagīr-i mezbûrun hâli ve tesviye-i umûruna vasîsi olan Yorgo v. Kosta zimmî vesâyeten meclis-i şerʻa ihzâr etdirdikleri derûn-ı arzuhâlde mezkûr Foti v. Anastaş nâm zimmî ile terâfuʻlarında bundan akdem hâlik-i mesfûr Foti zimmîye iştirâ eylediği sâlifü’z-zikr Karfa karyesinde vâkiʻ mülk menzil ve bağ semenlerinden mesfûr Foti zimmetinde yüz guruş hakkı bâkī kalıp meblâğ-ı mezbûr mevrûs olmağla taleb ederiz deyü daʻvâ eylediklerinde ol dahi ber-vech-i muharrer ikrâr ve iʻtirâf etmeğin mûcebiyle meblâğ-ı mezbûru müddeʻiyyûn-ı mezbûrûna edâ ve teslîme mesfûr Foti zimmîye tenbîh olunduğu baʻde’t-tescîl mübâşiri İbrahim Çavuş kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis aşer min-Cemâziyelevvel sene sittin ve miʼe ve elf.