Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 202 Hüküm no: 246 Orijinal metin no: [27a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütlüce’deki vakıf menzillerde ikâmet edenler arasındaki anlaşmazlıkların giderilmesi Maʻrûz; Fermân-ı âlîleri üzere cânib-i şerʻden mürsel mevlânâ Mehmed Efendi dâʻîleri derûn-ı iʻlâmda mezkûr Sütlüce’de mahâll-i nizâʻda akd-i meclis etdikde iʻlâm-ı şerʻî mantûkı üzere Gül Nasrâniye ve zevci Vartan müstecir olduğu vakıf menzilin icâreteyn ile mutasarrıfesi Afîfe nâm hatun ve muttasılında vâkiʻ papaz zevcesi Perapiyon müsteciren sâkine olduğu yine ol vakıfdan olan menzilin icâreteyn ile mutasarrıfı olan Mehmed nâm müteveffânın evlâd-ı sıgārı vasiyeleri anaları Zeyneb nâm hatunun müseccel vekîli Ahmed Odabaşı mütevellî-i vakf kıbelinden vekîl olan Molla Halil huzûrunda baʻde’l-murâfaʻa ve’l-münâzaʻa katʻına mübâşeret olunan bennâ zirâʻıyla müşâhed arzen bir zirâʻ altı parmak tûlen on üç zirâʻ saçak yerini mutasarrıfesi müddeʻiye-i mezbûre Afîfe Hatun yirmi beş guruş bedel-i makbûz mukābelesinde bâ-maʻrifet-i mütevellî defʻan-li’n-nizâʻ sıgār içün vasiyeleri vekîli mezbûr Ahmed Odabaşı muvâcehesinde ferağ ve kasr-ı yed ve saçak yerinde ebniye ihdâsıyla mesdûd olan dört pencerelerinden dahi keff-i yed eyledikde vekîl-i mezbûr dahi fâriğa olunan saçak cânibinde sıgār tasarruflarında olan menzil bahçesine müddeʻiye-i mezbûre Afîfe’nin nâzır penceresi kadîm ve mevcûd olmağla ibkā ve iktizâ eden havâleyi sıgār menzili müsteciresi merkūme Perapiyon defʻ ve müddeʻiye-i mezbûrenin sokak tarafında alt ve üst küşâd eylediği iki aded pencerelerinden sıgārın tasarruflarında olan menzilde makarr-ı nisvân mahal görünmeyecek ve önünü seddetmeyecek mertebe münharif tahta perde ile iktizâ eden havâleyi [27b] merkūme Gül ve zevci Vartan defʻ etmek üzere her biri taʻahhüd ve fî-mâ baʻd mutasarrıflar ve müstecirler mugāyir-i iʻlâm birbirlerine taʻarruz eylememek üzere reʼy-i mütevellîyle beynleri bi’t-terâzî tevfîk ve katʻ-ı nizâʻ eylediklerini mevlânâ-yı mezbûr vâkiʻ hâli baʻde’t-tahrîr ve’l-inhâ huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâbiʻ aşer min-Cemâziyelâhir li-sene sittin ve miʼe ve elf.