Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 141 Hüküm no: 171 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlullah Paşa Evkafından Pendik ve tevabii mukataasının iltizamının Kayserili Mehmed Ağa ve Ömer Yazıcı’dan alınarak Halil Efendi’ye verildiği < Evlâdiyet ve meşrûtiyet üzere mütevellîsi olan Gekbûze kasabasında vâki‘ ceddim merhûm Gāzî <> Fazlullah Paşa evkāfından Adalar nâhiyesine tâbi‘ Pendik ve tevâbi‘i mukāta‘ası işbu bin yüz seksen dört senesi Martı ibtidâsından sene-i mezbûr Şubat’ı gāyetine gelinceye değin bir sene zabt u rabt eylemek üzere nısf hisse içün Kartal sâkinlerinden Kayseriyeli Mehmed Ağa ve Ömer Yazıcı nâm kimesneler[e] temessük verilmişdir lâkin mezbûrlar re‘âyâyı ve vakfı tasarruf edüp iki def‘a olmak üzere derûnlarına ihtilâl düşürüp nizâmları muhtel olmağla merkūmların yedlerine verilen temessüke amel olunmamak üzere işbu dârende-i temessük umdetü’t-tahrîr ve’l-kalem kayınpederim Halil Efendi -zîde kadruhû-ya ber-vech-i emânet der-uhde ve iltizâm olunup ol dahi iltizâm ve kabûl etmeğin imdi mukāta‘ât-ı mezbûr mefrûzü’l-kalem ve maktû‘i’l-kıdem min-külli’l-vücûh serbestiyet [üzere] olup a‘şâr-ı şer‘iye ve rüsûm-ı örfiye ve cürm ü cinâyet ve bâd-ı hevâ ve mâl-ı gāib ve mâl-ı mefkūd yava ve kaçgun ve resm-i arûsâne ve resm-i ispençe ve resm-i ...? ve resm-i iskele ve beytülmal-ı âmme ve hâssa ve tapu-yı zemîn ve kul ve câriye ve müjdegāne ve sâire cüz’î ve küllî mahsûlât ve rüsûmât bi’l-cümle her ne ise vakf-ı şerîf içün mûmâ-ileyh ber-vech-i emânet ahz ü kabz eyleye ve siz ki re‘âyâ-yı vakıfsız mûmâ-ileyhi üzerlerinize voyvoda ve zâbit bilüp şer‘-i şerîf ve kānûn-ı münîf üzere sözünden tecâvüz eylemeyüp mukāta‘a-i mezbûrda olan umûrda merci‘ini kendüye eylemek üzere bir sene ber-vech-i emânet zabt u rabt eylemek üzere mûmâ-ileyh kayınpederim Halil Efendi yedine zabtı’çün işbu temessük mukaddem ve mu’ahhar târîhiyle merkūm Kayseriyeli Mehmed ve Ömer Yazıcı yedlerinde temessük zuhûr eder ise temessük-i mezkûra amel ve i‘tibâr olunmaya işbu temessük mûmâ-ileyh kayınpederim Halil Efendi’ye ber-vech-i emânet bir sene zabtı’çün işbu temessük i‘tâ olundu tarafımızdan ve taraf-ı âhardan hiç bir ferd dahl ü ta‘arruz etmeye ve’s-selâm. Fî 22 Zilka‘de sene [1]184 El-Mütevellî-i karye-i mezbûr İbrahim Ağa>>