Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 142 Hüküm no: 172 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurtkaryesi tımarının üçte iki hissesinin bir seneliğine Hüseyin Ağa’ya iltizam olunduğu Vech-i tahrîr-i hurûf budur ki Rumelihisarı mustahfız tımârlarından bâ-berat-ı şerîf-i âlîşân mutasarrıf olduğum Adalar nâhiyesine tâbi‘ Kurtkaryesi tımârında üç hissede iki hisse olmak üzere işbu bin yüz seksen beş senesine mahsûben sene-i mezbûr Martı ibtidâsından Şubat’ı gāyetine gelince zabt u rabt eylemek üzere tımâr-ı merkūme iltizâmına tâlib olan kıdvetü’l-emâcid ve’l-akrân izzetlü Hüseyin Ağa’ya yüz kırk guruşa iltizâm olunup onlar [ol] dahi iltizâmı kabûl etmekle bedel-i iltizâmı [olan] yüz kırk guruş mezbûr Hüseyin Ağa yedinden tamâmen ahz ü kabz olunmağla ağa-yı mûmâ-ileyhin yedine işbu iltizâm ve zabt temessükü verildi gerekdir ki sene-i mezbûrda hâsıl olan a‘şâr-ı şer‘iye ve rüsûmât ve tapu-yı zemîn ve sâir bâd-ı hevâ cüz’î ve küllî ve sene-i sâbıkları ne minvâl üzere zabt u rabt oluna geldi ise ol minvâl-i meşrûh üzere zabt u rabt eyleyüp ağa-yı mûmâ-ileyh yedine işbu iltizâm temessükümüz verildi ve mukaddem ve mu’ahhar temessüküm zuhûr eder ise amel olunup [olunmayup] ancak bu temessükümüze amel olunmak üzere tarafımızdan ve taraf-ı âhardan bir kimesne mâni‘ ve müdâhale olunmayalar [olmayalar]. Fi’t-târîhi’l-mezkûr. Bende İsmail Mustahfız-ı Tımâr-ı Hisâr-ı Rumeli.