Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 329 Hüküm no: 519 Orijinal metin no: [52b-9] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı Mustafa’nın borcunu ödemesi Maʻrûz-ı dâʻî-i Devlet-i aliyyeleridir ki; Hâlâ Sâdabâd sarayı neferâtlarına mevkūfe nukūdun mütevellîsi olan işbu sâhibü’l-iʻlâm Ahmed Usta nâm kimesne medîne-i Eyüb sâkinlerinden ihzâr-ı şerʻ olunan sâbık Hamâmî el-Hâc Mehmed nâm kimesne ile terâfuʻlarında mütevellîsi olduğum neferâta mevkūfe nukūdun benden mukaddem mütevellîsi diğer Ahmed Usta’dan mâl-ı vakf olmak üzere istikrâz ve kabz ve mesârifine sarf ile istihlâk ve ol vechile zimmetinde edâsı lâzım iki yüz doksan üç guruş ile üç rubʻ guruşunu mezbûr Hamâmî el-Hâc Mehmed’den taleb eylediğimde edâda taʻallül eder deyü bi’t-tevliye daʻvâ etdikde mezbûr Hamâmî el-Hâc Mehmed istintak, ber-vech-i muharrer cihet-i mezbûrdan iki yüz doksan üç guruş üç rubʻ guruş zimmetinde edâsı lâzım deyni olduğunu ikrâr ve iʻtirâf etmeğin mûcebiyle edâsına tenbîh ve tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâdî ve’l-ışrîn min-Cemâziyelevvel li-sene ihdâ ve sittin ve miʼe ve elf.