Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 330 Hüküm no: 523 Orijinal metin no: [53a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin alacaklı olduğu yolundaki iddiâsını ispatlayamadığı gibi kendisinin borçlu olduğunun tespiti Maʻrûz-ı dâʻî-i Devlet-i aliyyeleridir ki; Mehmed Beşe b. Yusuf bâʻisü’l-iʻlâm Kasab Mustafa Beşe b. Ali muvâcehesinde mezbûr Mustafa Beşe’nin dükkânında beş ay ...? ve hizmetinde olduğum müddet-i mezbûrede kavlimize binâʼen yetmiş guruş müctemiʻ ücretimi taleb ederim deyü daʻvâ ol dahi ol mikdâr ücretini inkâr eylediğinden mâʻadâ mezbûr Mehmed Beşe’nin âhara füruht eylediği lahm hesâbını yir[mi] gün mukaddem Otakçılar’da Müezzin Hüseyin nâm kimesne dükkânında ücret-i maʻlûmesini lahm bahâsından takāsan ahz ve altı guruş zimmetinde bana deyni zuhûr edip hatta mezbûr Mehmed Beşe ber-vech-i muharrer ikrâr ve işhâd dahi etmiş idi deyü defʻ ve meblâğ-ı bâkī-i mezbûr altı guruşu daʻvâ etdikde mezbûr Mehmed Beşe baʻde’l-inkâr mezbûr Mustafa Beşe ber-vech-i muharrer müddeʻâsını şuhûd-ı udûlden Süleyman Efendi b. Abdullah ve Ali Beşe b. ( ) nâm kimesneler şehâdetleriyle alâ-vechi’ş-şerʻî isbât etmekle mûcebiyle ücret mütâlebesinden müddeʻî-i mezbûr muʻârazadan baʻde’l-menʻ ve zimmetinde sübût bulan meblâğ-ı mezbûr altı guruşun edâsıyla mezbûr Mehmed Beşe baʻde’l-ilzâm medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sâlis ve’l-ışrîn min-Cemâziyelevvel li-sene ihdâ ve sittin ve miʼe ve elf.