Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 331 Hüküm no: 524 Orijinal metin no: [53a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ebûbekir’in borcunu ödemesi Maʻrûz-ı dâʻî-i Devlet-i aliyyeleridir ki; Bâʻisü’l-iʻlâm el-Hâc İbn İbrahim meclis-i şerʻde İbrahim b. Ebûbekir muvâcehesinde mezbûr İbrahim üç ay mukaddem beher vakıyyesi yüz yirmi altışar akçeye olmak üzere benden iştirâ ve kabz eylediği yüz yirmi dört vakıyye üç yüz dirhem mum fitili semeninden yüz otuz bir guruş hakkım olmağla meblâğ-ı mezbûrdan doksan altı guruş bir rubʻ guruşunu bana beyʻ eylediği doksan üç kıyye mum fitili semeninden olan deynime takās ve altı guruş dahi cihet-i âhardan takāsan ahz ve bâkī yirmi sekiz guruş üç rubʻ hakkımı mezbûr İbrahim vermediğinden mâʻadâ mevcûd ve müşterâm olan mârru’z-zikr doksan üç kıyye mum fitilini bana teslîm etmeyip bi-gayr-ı vechin şerʻî teslîmden imtinâʻ etmekle müşterâm olan mevcûd fitili ve semen-i bâkī-i mezbûru taleb ederim deyü mezbûr İbrahim’den daʻvâ etdikde ol dahi mezbûru baʻde’l-inkâr müddeʻî-i mezbûr müddeʻâsını mezbûr İbrahim muvâcehesinde el-Hâc Halil b. Murad ve İsmail b. Hüseyin şehâdetleriyle alâ-vechi’ş-şerʻî isbât etmekle mûcebiyle mevcûd olan doksan üç kıyye mum fitiline meblâğ-ı bâkī-i mezbûr yirmi sekiz guruş üç rubʻun edâsıyla mezbûr İbrahim baʻde’l-ilzâm medîne-i Eyüb mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’t-tâsiʻ aşer min-Cemâziyelevvel li-sene ihdâ ve sittin ve miʼe ve elf.