Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 339 Hüküm no: 542 Orijinal metin no: [54a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ciğerci Hüseyin Beşe’nin satıp caydığı tarla ve ev davasında zimmeti ibrâsı Maʻrûz-ı dâʻî-i Devlet-i aliyyeleridir ki; Ciğerci tâifesinden Hüseyin Beşe b. Mustafa nâm kimesne bâʻisü’l-iʻlâm Osman Beşe b. Mehmed nâm kimesne muvâcehesinde bundan akdem vilâyet-i Rumeli’de Manastır kazâsına tâbiʻ Dere karyesinde vâkiʻ maʻlûmü’l-hudûd ve’l-müştemilât mülk menzilimi semen-i maʻlûma ve makbuza beyʻ ve iki kıtʻa tarlamı dahi bedel-i maʻlûma ve makbûza bâ-maʻrifet-i sâhib-i ferağ ve ber-vech-i muharrer mezbûr Osman Beşe yedine hüccet-i şerʻiyye iʻtâ eylediğimden sonra beyʻ ve ferağa nâdim olup menzil-i mahdûd-ı mezkûru ve arâzi-i merkūmu bana reddolunmak üzere tasaddî eylediğim daʻvâdan fâriğ olup husûs-ı mezkûra müteʻallika daʻvâdan mezbûr Osman Beşe’nin zimmetini ibrâ ve iskāt eylediği medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’t-tâsiʻ aşer min-şehri Cemâziyelâhir li-sene ihdâ ve sittin ve miʼe ve elf.