Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 341 Hüküm no: 548 Orijinal metin no: [54b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Mehmed Emin Efendi’nin vârislerinin Bakkal Yani ve ortağı Dimitri’den alacaklı olduğu yolundaki iddiâlarını ispatlayamadıkları Maʻrûz-ı dâʻî-i Devlet-i aliyyeleridir ki; Medîne-i Eyüb’de Otakçılar’da sâkin iken fevt olan İmam Mehmed Efendi’nin sulbiye sagīre kızı Nefise’nin vâlidesi ve vasiyesi sâhibe-i arzuhâl Gülfem nâm hatun tarafından husûs-ı âti’l-beyânda sâbitü’l-vekâle vekîli Mehmed nâm kimesne ve derûn-ı arzuhâlde isimleri mezkûr Bakkāl Yani ve şerîki Dimitri muvâcehelerinde müteveffâ-i mezbûrun mesfûr Dimitri ve Yani zimmetlerinde cihet-i karzdan iki yüz guruş hakkı olup müteveffâ-i mezbûr kable’l-ahz fevt olmağın meblâğ-ı mezbûr sagīre-i mezbûreye mevrûs olmağla bi’l-vekâle taleb ederim deyü daʻvâ eyledikde onlar dahi bi’l-vasiye inkâr etmekle vekîl-i mezbûr müddeʻâsını beyâna kādir olmayıp vekîl-i mezbûr Mehmed Çelebi talebiyle mezbûrân Dimitri ve Yani zimmîlerden her biri ba‘de’t-tahlîfü’ş-şer‘î bilâ-beyyine bî-vech muʻârazadan menʻ olunduğu tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 23 Cemâziyelâhir sene 1161