Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 342 Hüküm no: 549 Orijinal metin no: [54b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı Ebûbekir’in borcunu ödemesi Maʻrûz-ı dâʻî-i Devlet-i aliyyeleridir ki; İstanbul’da Ali Paşa Mahallesi sâkinelerinden işbu bâʻisetü’l-iʻlâm Âişe bt. Hüseyin nâm hatun ihzâr-ı şerʻ olunan Yorganî Ebûbekir b. Süleyman nâm kimesne ile terâfuʻlarında mezbûr Yorganî Ebûbekir zimmetinde cihet-i karzdan bâ-temessük <> otuz yedi guruş hakkım olmağla taleb ederim deyü daʻvâ, ol dahi ber-vech-i muharrer ikrâr lâkin bi’d-defâʻat yirmi buçuk guruşunu müddeʻiye-i mezbûreye edâ etmiş idim deyü eylediği defʻini isbât eylemeyip ityân-ı beyyine[den] acz edip talebiyle müddeʻiye-i mezbûre Âişe Hatun ba‘de’t-tahlîfü’ş-şer‘î mûcebiyle meblâğ-ı mezbûr otuz yedi guruş ikrârına binâʼen müddeʻiye-i mezbûre Âişe Hatun’a edâ ve teslîm etmek üzere mezbûr Ebûbekir’e tenbîh-i şerʻî-birle Eyüb mahkemesinde ba‘de’t-tescîli’ş-şerʻî bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 25 Cemâziyelâhir sene 1161