Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 342 Hüküm no: 551 Orijinal metin no: [54b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Andon’un satın aldığını iddiâ ettiği bir çift yeşil küpenin Mardiros v. Samanin’e âid olduğunun tespit edildiği Maʻrûz-ı dâʻî-i Devlet-i aliyyeleridir ki; Medîne-i Eyüb’de İslâm Bey Mahallesi’nde kefere odaları ahâlîsinden işbu hâmilü’l-iʻlâm Mardiros v. Samavin nâm zimmî mahalle-i mezbûre mütemekkinlerinden Kuyumcu Andon v. Adam nâm zimmî ile Eyüb mahkemesinde terâfuʻlarında işbu müşâhed mevcûd bir çift yeşil sagīr habbe küpe mülküm olup mülkümde iken bir teki zâyiʻ ve mesfûr Andon yedinde bulmağla biʻl-istihkāk taleb ederim deyü baʻde’d-daʻvâ ve’l-istintak mesfûr Andon zimmî işbu müşâhed mevcûd bir tek yeşil habbe küpeyi rençber zümresinden işbu hâzır bi’l-meclis Marat v. Agop nâm Ermeni Balat dâhilinde Rum kenîsesinin önünde tarîkde bulup müşteriye irâʼet ve beyʻ eyle deyü vermişdir deyip müddeʻî-i mesfûrun mülkü olup mülkünde iken zâyiʻ olduğunu baʻde’l-inkâr müddeʻî-i mesfûr ber-vech-i muharrer müddeʻâsını beynlerinde udûlden Alişan v. Artin ve Agop v. Artin nâm zimmîler şehâdetleriyle vech-i şerʻî üzere baʻde’l-isbât ve’l-halfi’ş-şerʻî mûcebiyle aynı mevcûd ve müşâhed bir tek yeşil habbe küpeyi müddeʻî-i mesfûr Mardiros zimmîye tenbîh?-birle medîne-i mezbûre mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fî 26 Cemâziyelâhir sene 1161