Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 343 Hüküm no: 552 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Kirkor’un borcuna karşılık rehin olarak on dört miskal altın verdiği yolundaki iddiâsından vazgeçtiği Maʻrûz-ı dâʻî-i Devlet-i aliyyeleridir ki; Medîne-i Eyüb’de mütemekkin Haçador v. Kirkor nâm zimmî işbu bâʻisü’l-iʻlâm es-Seyyid Osman b. es-Seyyid Ali mahzarında ber-mûceb-i iʻlâm mahkûmün-bih cihet-i deyn-i şerʻîden olan on yedi guruş ile beş para deynim mukābelesinde mezbûr es-Seyyid Osman’a on dört miskāl altun bilezik rehin vazʻ etmiş idim deyü daʻvâya tasaddî ve mezbûr es-Seyyid Osman inkâr etmekle müddeʻâ-i mezkûremi isbât etmek üzere şâhide havâle olunmuş idi. El-hâletü hâzihî rehn-i mezbûrun aslı olmayıp daʻvâ-yı mezkûremde kâzib ve mübtil olup husûs-ı mezkûra müteʻallika mezbûr es-Seyyid Osman ile daʻvâ ve husûmetim yokdur deyü baʻde’l-ikrâr ve’t-tasdîk Eyüb mahkemesinde tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 26 Cemâziyelâhir sene 1161