Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 345 Hüküm no: 557 Orijinal metin no: [55a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasanoğlu deresinde iki sütçünün katledilmesi olayında faillerin yakalandığı Maʻrûz; Bâʻisü’l-iʻlâm Avcıbaşı Ali Ağa ve Alemdârı Mustafa Beşe Havâss-ı aliyye mahkemesinde meclis-i şerʻde Havâss-ı [refîʻa] kazâsına muzâfe Terkos nâhiyesinde Hasanoğlu deresinde katl olunan iki nefer sütcü keferesinin kātilleri olan Kör Mustafa ve İbrahim’i ahz eylediğimiz esnâda refîklerinden olup Dâye Hatun karyesi ahâlîlerinden işbu hâzır bi’l-meclis Emir Mehmed firâr edip hâlâ ahz olunmağla mezbûr Emir Mehmed’in takrîri ve tahrîr ve iʻlâm olunması iltimâs eylediklerine mezbûr Emir Mehmed’den hakīkat-i hâl suâl olundukda refîkimiz olup bundan akdem ahz olunan mezbûrân Kör Mustafa ve İbrahim zikr olunan iki nefer sütcü keferelerini mârru’z-zikr Hasanoğlu deresinde üçümüz maʻan önlerine inip küçük sütcünün üzerine ben hücûm ve yatağan taʻbîr olunur âlet-i câriha ile hamâilvârî göğsünden darb ve cerh ve başını kesip katl eyledim ve altı aded bargirlerini ahz eyledik deyü mezbûr Emir Mehmed’in ikrârı medîne-i Eyüb mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 2 Recebi’l-mürecceb sene 1161