Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 345 Hüküm no: 556 Orijinal metin no: [55a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Odabaşı’nın boşadığı karısı Ayşe Hatun’a nafaka, mihir ve sâir alacaklarını ödemesi Maʻrûz; Medîne-i Eyüb’de Mehmed Bey Mahallesiʼnde sâkine bâʻisetü’l-iʻlâm Âişe bt. Hasan’ın oğlu ve tarafından zikr-i âtî husûsda vekîli olduğu Osman b. Ömer ve Ahmed b. İsmail nâm kimesneler şehâdetleriyle vekâleti sâbit olan Mehmed b. Ahmed nâm kimesne meclis-i şerʻde Süleyman Odabaşı b. Halil muvâcehesinde mezbûr Süleyman Odabaşı vâlidem ve müvekkilem mezbûre Âişe Hatun’un zevci olup beş gün mukaddem tatlîk etmekle zimmetinde mütekarrir ve maʻkūdun-aleyh olan iki bin akçe mehr-i müecceli ile nafaka-i iddet-i maʻlûme ve meʼûnet-i süknâsı içün kadr-i maʻrûf takdîr olunan altı yüz akçe ki; cemʻan iki bin altı yüz akçe hakkını taleb ederim deyü bi’l-vekâle daʻvâ etdikde ol dahi ber-vech-i muharrer husûs-ı mezkûru ikrâr ve iʻtirâf etmekle mûcebiyle meblâğ-ı mecmûʻ-ı mezkûrun edâsıyla mezbûr Süleyman Odabaşı baʻde’l-ilzâm ve’t-tescîl bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fî 30 Cemâziyelâhir sene 1161