Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 347 Hüküm no: 562 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in bıçak ile yaralandığının tespit olunduğu Maʻrûz; Medîne-i Ebâ Eyüb el-Ensârî’de Baba Haydar Mahallesi sâkinlerinden mecrûhen sâhib-i firâş olup meclis-i şerʻa huzûru müteʻazzir olan Mustafa b. Mehmed b. Abdullah’ın zevcesi ve tarafından zikr-i âtî husûsu daʻvâ ve sulh ü ibrâya sâbitü’l-vekâle vekîli Emine bt. İbrahim nâm hatun bâlâ-yı arzuhâlde mastûr olup mahbûsen ihzâr olunan Hilalci Ömer Beşe b. Abdülgani mahzarında târîh-i iʻlâmdan on gün mukaddem mahalle-i mezbûrede merhûm Şeyhü’l-İslâm Medresesi kurbünde tarîkde akşama karib mezbûr Hilalci Ömer Beşe âlet-i cârihadan beyaz kabzalı bıçak ile zevcim müvekkilim mezbûr Mustafa’nın işbu Cerrâh Salih maʻrifetiyle kıbel-i şerʻden keşf ve muʻâyene olunduğu üzere sağ tarafda memesi üstünden amden ve bi-gayr-ı hakkın darb ve cerh etmişdir baʻde’s-suâl mûcib-i şerʻîsi icrâsı matlûbumdur deyü bi’l-vekâle baʻde’d-daʻvâ ve’l-istintak mezbûr Hilalci Ömer Beşe husûs-ı mezkûru bi’l-külliye baʻde’l-inkâr vekîl-i mezbûr Emine Hatun ber-minvâl-i muharrer müddeʻâsını şuhûd-ı udûlden medîne-i mezbûrede Cezerî Kasımpaşa Mahallesi’nden es-Seyyid İsmail b. Süleyman ve Yeniçeşme’de sâkin el-Hâc Mehmed b. el-Hâc Salih nâm kimesneler şehâdetleriyle münkir-i mezbûr Hilalci Ömer Beşe muvâcehesinde vech-i şerʻî üzere baʻde’l-isbât mûcebiyle cerh-i mezkûrun mûcib-i şerʻîsi icrâsı berʼ-i tâm husûlüne tevkīf-birle tescîl olunduğu huzûr-ı âlîlerine iʻlâm olundu. Fermân hazret-i veliyyü’l-emrindir. Fî 7 min-Recebi’l-ferd sene 1161