Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 348 Hüküm no: 563 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Halil’in alacaklı olduğu yolundaki iddiâsını ispatlayamadığı Maʻrûz; Sâhib-i arzuhâl Bostanî Halil b. Mehmed nâm kimesne meclis-i şerʻde Şuhud Burgos karyesi mütemekkinlerinden olup bundan akdem hâlik olan Lazari nâm hâlikin veresesinden hâmilü’l-iʻlâm zevcesi Marboya ve sulbî kebîr oğlu Zefiri muvâcehelerinde hâlik-i merkūm Lazari zimmetinde karz-ı şerʻîden yirmi yedi buçuk guruş hakkım olup ben kable’l-ahz ve’l-istîfâ mesfûr Lazari hâlik olmağla terekesinden taleb ederim deyü bundan akdem hâkim-i âhar huzûrunda daʻvâ ve baʻde’l-istimhâl ve’l-imhâl şâhidlerim mevcûd olmamakla isbâtdan aczim olup hâlâ şâhidlerim hazır olmağla meblâğ-ı mezbûru taleb ederim deyü eylediği müddeʻâsını merkūme Mariyora ve mesfûr Zafiri baʻde’l-inkâr müddeʻî-i mezbûr Bostanî Halil’in ikāmet eylediği bir nefer şâhidi Abdi b. Salih vech-i şerʻî üzere şehâdet eylemeyip ve şâhid-i âhar ikāmetinden aczi mütebeyyin olmağla talebiyle mezbûrlardan her biri ba‘de’t-tahlîfü’ş-şer‘î mûcebiyle bilâ-beyyine-i âdile bî-vech muʻârazadan menʻ olunduğu medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fî 7 min-Recebi’l-ferd sene 1161