Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 352 Hüküm no: 572 Orijinal metin no: [56b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Ahmed Hatun’un nakit para ve altınlarının çalındığı yolundaki iddiâsını ispatlayamadığı Maʻrûz; Medîne-i Eyüb’de Takyeci Mahallesiʼnde sâkine Râbia bt. Ahmed nâm hatunun zâtı baʻde’t-taʻrîfi’ş-şerʻî meclis-i şerʻde bâʻisü’l-iʻlâm Hâfız Molla Hasan b. Mustafa ve Ahmed b. Mehmed ve Molla Hasan b. Ali muvâcehesinde on beş gün mukaddem vasiyetim esnâsında gāib ani’l-meclis Şeyh Abdullah Efendi ve Mustafa Çavuş Ağa ve mezbûrûn Hâfız Molla Hasan ve Ahmed ve Molla Hasan beş nefer kimesneler menzilime gelip sanduka içinde mevcûd nakd elli üç guruş ile on iki Frengî altun ve bir nısf altunum zâyiʻ olup ancak mezbûrûn Hâfız Molla Hasan ve Molla Ahmed ve Molla Hasan mazannam olmağla taleb ederim deyü eylediği daʻvâsını mezbûrlardan her biri baʻde’l-inkâr müddeʻiye-i mezbûre müddeʻâsını beyâna kādire olmadığından gayrı yemîne dahi tâlibe olmamağla bilâ-beyyine ve bilâ-yemîn bî-vech muʻârazadan müddeʻiye-i mezbûre menʻ olundukdan sonra sâkine olduğu mârru’z-zikr mahallesi imamı Mustafa Efendi b. Ömer ve müezzin Molla Mehmed Halîfe b. Ömer ve es-Seyyid Ahmed Çelebi b. es-Seyyid Şaʻban ve Mehmed Çelebi b. Sefer ve sâirleri dahi mezbûre Râbia her bâr nâssa bu makūle ifk ü iftirâ etmesi âdet-i müstemirresidir deyü muvâcehesinde haber verdikleri medîne-i Eyüb mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fî 11 min-Recebi’l-ferd sene 1161