Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 353 Hüküm no: 573 Orijinal metin no: [56b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. İbrahim’in kendisini bıçakla yaralayan Mehmed Beşe ile anlaştığı Maʻrûz; Medîne-i Eyüb’de Emir Buhârî Mahallesi’nden kırk bir bölük neferâtından Halil b. İbrahim b. Abdullah’ın tarafından zikr-i âtî husûsda vekîl olduğu Ömer Çelebi b. Mustafa ve İbrahim Çelebi b. Mehmed şehâdetleriyle sâbit olan Mehmed Beşe b. Hüseyin meclis-i şerʻde yine orta-yı mezkûre neferâtından kasaba-i Kasımpaşa’da el-Hâc Ahmed Mahallesi’nden işbu bâʻisü’l-iʻlâm Mehmed Beşe b. Ömer muvâcehesinde müvekkilim mezbûr Halil ve mezbûr Mehmed Beşe maʻan Havâss-ı refîʻa kazâsında Litros karyesinden gelirler iken esnâ-i tarîkde târîh-i iʻlâm günü ale’s-seher mezbûr Mehmed Beşe müvekkilim mezbûr Halil’in sol memesi üstünden bıçak ile amden ve bi-gayr-ı hakkın darb ve cerh eyledi deyü tasaddî eylediği daʻvâ-yı mezbûresinden vesâtet-i muslihûn ile mezbûr Mehmed Beşe ile an-inkâr altı guruş bedel-i makbûza sulh olup cerh-i mezkûra ve mâ-yuhdesü anhuya müteʻallika âmme-i deʻâvîden mezbûr Mehmed Beşe’nin ol dahi bedel-i sulhden müvekkilim mezbûr Halil’in birbirlerinin zimmetlerini ibrâ ve katʻ-ı nizâʻ etdikleri Eyüb mahkemesinde tescîl ve taʻyîn olunan Mumcu Ahmed kulları iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 12 min-Receb sene 1161