Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 356 Hüküm no: 578 Orijinal metin no: [57a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Kemal’in süt alış-verişinde anlaşmazlığa düştüğü Maʻrûz; Sâhib-i arzuhâl Kemal nâm Yahûdi Avaso nâm karyeden derûn-ı arzuhâlde mastûr Marko v. Simo nâm zimmî muvâcehesinde bundan akdem narh-ı cârî üzere bana süt vermek üzere ber-vech-i peşin yüz seksen yedi buçuk ve karz on beş guruş yedimden mesfûr Marko ahz u kabz etmekle rûz-ı Hızır’dan mukaddem çetelemize göre turfanda taʻbîr olunur altı yüz <> doksan iki vakıyye ve rûz-ı Hızır’dan sonra iki bin üç yüz vakıyye leben benim makbûzum olup beynimizde bahâsı katʻ olunmayıp narh-ı cârî üzere hesap görelim dedikde mesfûr Marko zimmî turfanda sütün her bir vakıyyesine dokuz akçe ve rûz-ı Hızır’dan sonra verdiği sütün her vakıyyesine altışar akçe mütâlebesiyle leben vermekde mümânaʻat ve kârhânenin taʻtiline bâʻis olur deyü daʻvâya tasaddî ve mesfûr Marko istintak olundukda ber-vech-i muharrer süt vermek üzere müddeʻî-i mesfûr Kemal yedinden peşin yüz seksen yedi buçuk ve karz on beş guruş kabzını ikrâr ve iʻtirâfından sonra maʻlûmü’l-kıyye sütün narh-ı cârî üzere ve kethüdâlarına dahi râzı olmayıp turfanda verdiği sütün kıyyesine <> dokuzar akçe ve rûz-ı Hızır’dan sonra verdiği sütün kıyyesine altışar akçeden taleb ve âhar yerde murâfaʻa olurum deyü şirrete sâlik ve taʻcîzden hâlî olmadığı huzûr-ı âlîlerine iʻlâm olundu. Fermân hazret-i veliyyü’l-emrindir. Fî 15 min-Recebi’l-ferd sene 1161