Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 355 Hüküm no: 577 Orijinal metin no: [57a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hapse atılan Yahûdi Mayer’in müflis olduğundan borcunu ödeyecek hiçbir malının bulunmadığı Maʻrûz; Mahbûsen murâfaʻaları bâbında sâdır olan fermân-ı âlîlerine imtisâlen Havâss-ı refîʻa muzâfâtından Hasköy’de mütemekkin olup es-Seyyid Ahmed Çavuş mübâşeretiyle Eyüb mahkemesine ihzâr olunan bâlâ-yı arzuhâlde mastûr Mayer v. Musa nâm Yahûdi’nin hasmı dâyini derûn-ı arzuhâlde ismi mezkûr Berber Mustafa nâm kimesne mesfûr Mayer Yahûdi muvâcehesinde bir kıtʻa iʻlâm mûcebince kırk guruş deyni içün yetmiş günü mütecâviz mesfûr Mayer vazʻ-ı zindân ve habs ve tazyik olunup lâkin mesfûr Mayer’in ismi mâl ıtlâk olunur nesnesi olmayıp müflis olduğunu dâyin-i mezbûr Berber Mustafa muʻterif oldukdan mâʻadâ mesfûrun eğninde olan esbâbdan gayrı nesneye mâlik ve edâ-yı deyne kādir hâli olmayıp muʻsir ve muʻdim ve müflis olduğunu mahalle ahâlîsinden bî-garaz Müslimîn haber verip yesârı sabit olmadıkca hapsi meşrûʻ olmadığı huzûr-ı âlîlerine iʻlâm olundu. Maʻlûm-ı devletleri buyruldukda bâkī fermân hazret-i veliyyü’l-emrindir. Fi’l-yevmi’r-râbiʻ aşer min-Recebi’l-ferd li-sene ihdâ ve sittin ve miʼe ve elf.