Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 367 Hüküm no: 602 Orijinal metin no: [59a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezmarağda bt. Tanaş’ın dava açtığı Drako v. Rigamorevi ile anlaşmaya vardığı Maʻrûz; Havâss-ı refîʻa kazâsına tâbiʻ Karfa nâm karye mütemekkinelerinden şahsı taʻrîf-i şerʻî ile muʻarrefe olan hâmil-i arzuhâl Ezmarağda bt. Tanaş nâm Nasrâniye meclis-i şerʻde zikr-i âtî emlâke vazʻ-ı yedi sâbit olan derûn-ı arzuhâlde isimleri mastûr Drako v. Rigamorevi nâm zimmînin dâmadı ve tarafından husûs-ı âti’z-zikri tasdîka sâbitü’l-vekâle vekîli Zahari v. Yorgo nâm zimmî muvâcehesinde havâss-ı mezbûr muzâfâtından Terkos nâhiyesinde Aya Yorgi nâm karyede vâkiʻ her birinin hudûdları maʻlûm bir bâb mülk menzil ve tahmînen beş dönüm kürumu mülk bir kıtʻa bağın nısfı babam Tanaş nâm hâlikden müntakile mülk-i mevrûsum olduğu hâlde senevî yirmi beşer guruş ücret ile on iki sene mukaddem müvekkil-i mesfûr Drako zimmîye îcâr ve teslîm ol dahi baʻde’l-istîcâr ve’l-kabûl müddet-i maʻlûmede müctemiʻ icâreyi vermeyip ve mârru’z-zikr menzil ve nısf bağı fuzûlî zabt eder deyü daʻvâ eylediğimde ol dahi husûs-ı müddeʻâ-i mezkûreyi baʻde’l-inkâr ve vazʻ-ı yed olduğu zikr olunan menzil ve bağın nısfı babam mesfûr Riga nâm hâlikin bâ-hüccet-i şerʻiyye [59b] şirâʼen ile’l-helâk mülkü olup baʻde helâkihî müntakil mülk-i mevrûsum olmağla babam hâlik-i mesfûr ve ben kırk seneden mütecâvizdir bilâ-nizâʻ muvâcehede zabt ve tasarruf ederiz deyü bu vechile beynlerimizde münâzaʻât-ı kesîre ve şedîde vukūʻundan sonra bâ-vesâtet-i muslihûn daʻvâ-yı mezbûremden müvekkil-i mesfûr Drako ile an-inkâr doksan guruş bedel-i makbûza sulh olup menzil-i mezkûra ve nısf bağa ve ücret-i müctemiʻaya müteʻallika âmme-i deʻâvîden ben ve müvekkil-i mesfûr Drako dahi bedel-i sulhden benim, birbirlerimizin zimmetlerini ibrâ ve iskāt ve katʻ-ı nizâʻ eyledik dedikde ol dahi tasdîk edip vech-i meşrûh üzere hüccet olunduğu mübâşir Atmaca Süleyman Çavuş iltimâsıyla tescîl ve huzûr-ı âlîlerine iʻlâm olundu. Fermân hazret-i veliyyü’l-emrindir. Fî 28 min-Recebi’l-ferd sene 1161