Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 366 Hüküm no: 601 Orijinal metin no: [59a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Subaşı Abdullah Ağa’nın gözetiminde bulunan Gürcü asıllı Fati bt. Ahmed isimli câriyenin sahibine iâdesi Maʻrûz; Kumkapı hâricinde Kürkcübaşı Mahallesiʼnde sâkine işbu bâʻisetü’l-iʻlâm zâtı taʻrîf-i şerʻî ile muʻarrefe olan Hatice bt. Abdullah nâm hatun medîne-i Eyüb mahkemesinde meclis-i şerʻde medîne-i mezbûrede ibâk ahzına meʼmûr olan Subaşı Abdullah Ağa mahzarında Acem Gürcüsü Fati bt. Ahmed nâm câriye târîh-i iʻlâmdan bir gün mukaddem mülkümden ibâk, mezbûr Abdullah Ağa bi’l-emâne ahz etmekle bi’l-istihkāk taleb ederim deyü eylediği daʻvâ-yı meşrûhunu mahalle-i mezbûre ahâlîsinden Ali Beşe b. el-Hâc Ahmed ve Hasan Beşe b. Mehmed nâm şâhidân-ı muʻaddilân vech-i şerʻî üzere baʻde’l-isbât yemîne dahi tâlib olunmamağla câriye-i mezkûreyi müddeʻiye-i mezbûre Hatice Hatun’a teslîme mezbûr Subaşı Abdullah Ağa’ya tenbîh olunduğu tescîl olunup bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 28 min-Recebi’l-ferd sene 1161