Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 369 Hüküm no: 607 Orijinal metin no: [59b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarhoş gezip komşularını rahatsız eden Kel İbrahim’in yakalandığı Maʻrûz; Bâ-fermân-ı âlî izzetlü bostancıbaşı ağa taraflarından erâzil ve eşkıyâ makūlelerini teftîş ve tefahhus ve ahzına meʼmûrlardan Vâlidesarayı Ustası Ali Ağa kulları hîn-i teftîşde Havâss-ı refîʻa kazâsında Pednehor nâm karyeden Kel İbrahim demekle maʻrûf kimesneyi ahz ve Eyüb mahkemesinde meclis-i şerʻa ihzâr ve muvâcehesinde mezbûr Kel İbrahim dâimâ şürb-i hamr edip kurâ ahâlîsinin ehl ü ıyâllerine tecâvüz ve ebnâ-yı sebîlin yollarına inip katl-i nüfûs ve nehb-i gāret-i emvâl ve cemîʻ türlü fesâd ve şekāveti mürtekib [ve] şekāvetinin nihâyeti ve bir vechile emn ü rahatları olmayıp sû-i hâlini ihbâr ve hakkından gelmek üzere mukaddemâ iki defʻa iʻlâm dahi olunmuşdur deyü şakī-i mezbûru ahz etdirmeleriyle ben dahi ihzâr-ı şerʻ etmişimdir baʻde’s-suâl takrîrleri üzere iʻlâm olunsun deyicek mezbûr Kel İbrahim baʻde’l-inkâr şakī-i mezbûrun sâkin olduğu sâlifü’l-beyân Pednehor karyesinin müezzini olan Ali Efendi ve ahâlî-i karyeden Arslanoğlu Ali Beşe ve Mehmed b. Ahmed ve Mehmed b. Mustafa ve Hasan b. Mehmed ve Ali b. Halil ve Ahmed b. Mustafa ve Mehmed b. Mustafa nâm kimesneler li-ecli’ş-şehâde meclis-i şerʻa hazırûn olup baʻde’s-suâl işbu ahz olunan mezbûr Kel İbrahim bâlâda tafsîl olunduğu üzere dâima şürb-i hamr ve ebnâ-yı sebîlin yollarına inip katl-i nüfûs ve malların nehb ü gāret ve türlü fesâd ve şekāveti mürtekib muzır, ibâddan izâlesi lâzım şakīdir hatta ber-vech-i muharrer sû-i hâlini zâhir mukaddemâ hakkında iʻlâm dahi olunmuşdur deyü sû-i hâlini her birleri muvâcehesinde alâ-tarîkı’ş-şehâde haber ve yedinden ibâdullah tahlîs buyrulmak bâbında tazallüm-ı hâl etdikleri iltimâslarıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin ve’l-ışrîn min-Recebi’l-ferd li-sene ihdâ ve sittin ve miʼe ve elf.